بوهيموند التانى
معلومات شخصيه
الميلاد	سنة 1108   بارى
الوفاة	فبراير 1130 (21–22 سنة)  كيليكيا
ابناء	كونستانس اميرة انطاكيا
الاب	بوهيموند الاول
الحياه العمليه
المهنه	عسكرى
اللغات المحكيه او المكتوبه	فرنسيه قديمه
تعديل مصدري - تعديل

بوهيموند التانى امير انطاكيه Bohemond II of Antioch ( اتولد 1108 - اتوفى 1130 ) ، ابن بوهيموند الاول و كونستانس Constance بنت فيليب الاول Philip I ملك فرنسا. كان امير تارانتو و حكم انطاكيا من 1126 ل 1130 بعد وفاة ابوه بوهيموند الاول مؤسس امارة انطاكيا و الاوصيا تانكرد Tancred و روجر اوف ساليرنو Roger of Salerno.

لما اتوفى ابوه كان بوهيموند التانى لسه طفل صغير عايش فى ابوليا Apulia فى جنوب ايطاليا فمسك تانكرد ابن اخت ابوه الحكم لغاية ما اتوفى سنة 1112 ، و اتعين روجر اوف ساليرنو وصى عليه على بال ما يكبر و يقدر يحكم ، لكن روجر اتقتل فى معركة اجير سانجوينيس سنة 1119. فى الوقت ده كان بوهيموند عنده حداشر سنه فطلب الانطاكيين من بولدوين التانى Baldwin II ملك بيت المقدس مسك الحكم فى انطاكيا فبقى وصى على بوهيموند. فى خريف 1126 وصل بوهيموند لانطاكيا و فى بدايات 1127 اتجوز اليس Alice بنت بولدوين .

حكم بوهيموند التانى بدأ بحصاره و استيلائه على كفرطاب سنة 1127 ، لكن دخل بعدها فى صراع مع چوسلين كونت الرها Joscelin I of Edessa و اتحول الصراع لحرب ما انتهتش الا بعد ما اتدخل بولدوين التانى. بوهيموند التانى و چوسلين حاولو يستولو على حلب لكن فشلو.

فى سنة 1129 بوهيموند دخل فى تحالف مع بولدوين و چوسلين و قدرو انهم يستولو على بنياس ، و بيقول اسامه بن منقذ فى حولياته ان بوهيموند هاجم شيرز فى فترة حكمه القصيره.

فى بدايات 1130 وقت ماكان بوهيموند مشغول فى حمله على مملكة كيليكيا اصطدم بقوات تابعه للترك الدانشمنديين اللى ابادو كل جيشه و قطعو رقبته.

بعد قتل بوهيموند التانى اتشجع المسلمين فى حلب بقيادة عماد الدين زنكى. انطاكيا كان صعب عليها المقاومه لإن ماكانش فيها حاكم حيث ان بوهيموند ماخلفش غير بنت اسمها كونستانس كان عندها وقتها سنتين. ارملته اليس انتزعت طوالى عرش انطاكيا من غير ما تستنى لغاية ابوها بولدوين ما يعين وصى على العرش.