لبنى الحسين
معلومات شخصيه
الميلاد	سنة 1973 (العمر 50–51 سنة)  الخرطوم
الاقامه	السودان
مواطنه	السودان
الحياه العمليه
المهنه	صحفيه ،  وكاتبه
اللغات المحكيه او المكتوبه	عربى
تعديل مصدري - تعديل

• Lubna Al-hussain victim of new Dark Age

لبنى احمد الحسين ، صحفيه سودانيه فى جورنال " الصحافه " فى السودان و بتشتغل مسؤولة اعلام فى بعثة الامم المتحده فى السودان ، اتقبض عليها فى حفله فى مطعم ^[1] فى الخرطوم عاصمة السودان يوم 3 يوليه 2009 هى و اتناشر ست بتهمة لبسهم هدوم بتتنافى مع قواعد النظام العام فى البلاد.

الهدوم اللى بسببها اتقبض على الستات كانت " بنطلونات ". و تم جلد عشره من الستات فى مفوضه فى وسط الخرطوم ، و اتوجهت التهم للتلاته الباقيين اللى من ضمنهم الصحفيه لبنى احمد الحسين و حا تتم محاكمتهم تبع للفصل 152 من القانون الجنائى السودانى لسنة 1991 اللى بتصل العقوبه فيه ل40 جلده. و بالمناسبه دى وزعت لبنى الحسينى 500 كارت دعوه عشان الناس تروح تتفرج عليها و هى بتتجلد.

و قال الجورنال ان قضيتها هى قضية العشر ستات اللى اتجلدو زى ما هى قضية مئات الستات اللى بيتجلدو كل يوم و كل شهر و كل سنه بسبب اتهامهم بلبس هدوم بتتنافى مع قواعد النظام العام فى البلاد و بيتم قهرهم و بيتصابو بأمراض خطيرة من شدة التعسف و القهر و الذل بس لانهم لبسوا بنطلونات اللى بيعتبرها القانون هناك افعال فاضحه.^[2]

انتقدت النوعيه دى من القوانين و العقوبات المنظمات المدافعه عن حقوق الانسان و المثقفات النشيطين فى مجال الدفاع عن حقوق النسا. و اتحطت علامة استفهام عن طبيعة الثقافه السايده فى منطقة الشرق الاوسط.

بتقول الكاتبه ديانا مقلد ان حال لبنى الحسين بيحاكى حال ملايين الستات فى المجتمعات العربيه .^[3]

لبنى الحسين صرحت بإنها مش حا تتراجع عن موقفها لحد لو اتكربجت "40 الف جلده". و ذكرت : " اتعرضت عشرات الالاف من الستات والفتيات للجلد خلال السنين العشرين الماضية ".^[4]

فى يوم 4 اغسطس 2009 احتشدت الستات المقهورات قدام محكمة الخرطوم و قامو بمظاهرة و هما لابسين بنطلونات لتأييد لبنى الحسين اللى معرضه للجلد بكرابيج القهر و الذل عشان لبست بنطلون. و جت قوات بعصيان و خرزانات و غازات مسيله للدموع للتصدى للستات المحتجين على قهر النسا و تفريقهم.

قالت واحده من الستات اسمها زينب بدر الدين انها بتعارض القانون ده اللى ضد النسا و حقوق الانسان و ان قضايا " الاتيان بفعل فاضح " - زى لبس ست لبنطلون - شايعه فى السودان اللى فيه هوه ثقافيه واسعه بين الشمال اللى اغلبيته عرب مسلمين و الجنوب اللى بيسكنه مسيحيين .^[5]

ورفع المتظاهرين لافتات اتكتب عليها : " مبادرة قهر الستات .. لا رجوع لحوش الستات .. لا رجوع لعصور الظلام ( No Return to Dark Ages ) " ( لا رجوع لعصور الظلام ).^[6]

فى يوم 7 سبتمر انعقدت محاكمة الست السودانيه الشجاعه المقهوره زى غيرها من الستات. و قدام الضغط الدولى من منظمات حقوق الانسان و الناس المستغربه فى نواحى الدنيا اكتفت محكمة شمال الخرطوم بمعاقبة لبنى الحسين بغرامه قيمتها 200 دولار أمريكى عشان لبست بنطلون و ما حكمتش بجلدها 40 جلده بالكرباج و ما اتجلدتش زى الستات التانيه لإن قضيتها اشتهرت و وصلت لأركان الدنيا بعد حملتها للدفاع عن حقوق النسا. لكن لبنى الحسين رفضت تدفع الغرامه لإنها شايفه انها ما ارتكبتش جريمه تستحق العقاب عليها فأتقبض عليها و اترمت فى سجن فى مدينة ام درمان.

فى حوار مع فرانس بريس قالت لبنى الحسين : " مش حاأدفع الغرامه واحسن دخول السجن " ، و ما قدرش محاميها يقنعها بدفع الغرامه و الخلاص من الذل و القهر اللى عايشه فيه من مده إكمنها لبست بنطلون. و قال محامى تانى اسمه جلال سعيد إن لبنى الحسين ناويه تستأنف الحكم و إنها مستعده لرفع القضيه للمحكمة الدستوريه، و دى اعلى هيئه قضائيه فى السودان بهدف إلغاء القانون الللى بيسمح بجلد الستات بالكرابيج. و ده بيوضح إنها شايفه القضيه على انها قضية كل الستات المقهورات اللى بيتعرضو للجلد و مش قضيتها هى وحدها.

وقت عقد المحاكمه اتجمع بره المبنى فى الشارع حوالى 100 شخص غالبيتهم ستات للتضامن مع لبنى الحسين و رفعو لافتات مكتوب عليها كلام بيندد بقهر الستات و اذلالهم زى : " لا للجلد ". و قالت واحده مشاركه ان جلد الستات بيسيئ للسودان ومش من عاداته و تقاليده. و فى الوقت اللى المتضامنين مع لبنى متجمعين جم ناس بيسموهم اسلاميين و اشتبكو معاهم فى خناقه و هتفو " الله اكبر " فهجم البوليس و فرق المتخانقين بالعصيان و قالت الانباء إن البوليس قبض على 40 ست. و قالت واحده اسمها هاديه حسب الله و هى من ضمن المعتقلين لفرانس بريس : " إحنا 48 ست اعتقلوا و بعضنا مصابات و واحده بتنزف" .^[7]

و ذكرت الكاتبه ديانا مقلد إن قضية لبنى الحسين فى صلب أزمات العرب لإن حكوماتهم بتصدر قوانين غريبه اقل ما فيها إنها بتستهين بعقول الناس و كرامتهم ، وبكده حكومات زى دى مش مؤمنه على المصاير و الأقدار .^[8]

لبنى الحسين اتهمت بعمل " فعل فاضح " لإنها لبست بنطلون و كانت معرضه للجلد بالكرابيج زى ما بيحصل لستات كتيره من غير ما حد يسمع. لبنى الحسين صحفيه متعلمه و بتشتغل فى هيئه تابعه للأمم المتحده فقدرت إنها تلفت أنظار العالم لقضيتها اللى اعتبرتها قضية كل ست بتتعرض للذل و المهانه و الضرب بالكرابيج، و رفضت انها تدفع الغرامه اللى حكمت بيها المحكمه عشان تخلص منها بعد ما العالم كله سمع عن القضيه و استغرب. و بعد ما اترمت فى السجن لرفضها دفع الغرامه دفعت نقابة الصحفيين السودانيه المبلغ للسلطات و افرجو عنها قبل الموضوع ما يبقى على كل لسان فى العالم.

لبنى الحسين قالت هى اللى تتعرفش مين اللى دفع الغرامه عشان يسيبوها لإنها كانت طلبت من اهلها و معارفها انهم ما يدفعوش حاجه. و قالت انها و هى فى السجن شافت مئات الستات مسجونين حسب الامن العام اللى دخلها هى نفسها السجن.

المفوضية العامه للامم المتحده لحقوق الانسان أدانت الحكم على لبنى الحسين ، وقال المتحدث باسم المفوضيه روبرت كولفيل ان حالة لبنى احمد الحسين بتبين من وجهة نظر المفوضيه موضوع اكبر و هو القوانين اللى بتتضمن تمييز فى حق النسا فى السودان.

فرنسا كدوله متحضره عايشه فى القرن الواحد و عشرين أشادت بـ"المعركه الشجاعه" اللى خاضتها لبنى الحسين عشان حقوق النسا فى السودان. الجرانيل السودانيه من جهتها اتمنعت من نشر اى تغطيه لقضية لبنى الحسين .^[9]

قضايا تحقير البشر و إذلالهم فى المنطقه العربيه بقت من القضايا المهمه اللى العالم بيتابعها و بقت بتظهر فى الجرانيل و المقالات مصطلحات جديده زى عصر الظلام الحديث.

تحت ضغط منظمات حقوق الانسان اتحكم على لبنى الحسين - بسبب شهرتها - بدفع غرامه على لبس البنطلون بدل الجلد. لكن غيرها أتجلدو بالكرابيج.

لبنى كان اتقبض عليها مع 12 ست لابسين بنطلونات. اتجلد منهم عشره طوالى فى قسم البوليس و اتحولت لبنى للمحاكمه بسبب حصانتها لإنها بتشتغل فى مكتب تابع للأمم المتحده. اتحكم على لبنى بدفع غرامه و اتسجنت لغاية ما دفعت نقابة الصحفين الغرامه عشان يخلصو من الموضوع اللى انتشر خبره فى العالم. لكن فى 22 اكتوبر 2009 المحكمه حكمت على الستات الغتنين بالجلد بالكرباج لإنهم مش معروفين. و بتقول لبنى الحسين إن فى محاكمتها كان فيه دبلوماسيين موجودين فى القاعه لكن فى محاكمة الستين التانيين ما حدش حضر و ده يبين انهم ما كانوش متساويين قدام المحكمه.

بتقول لبنى الحسين إن السنه اللى فاتت وحده إتقبض فى الخرطوم على حوالى 45.000 ست بسبب الهدوم.^[10]

لبنى الحسين هربت من السودان فى اوائل شهر نوفمبر 2009 و هى متخفيه بنقاب افغانى بيغطى كل حاجه لحد العينين و قدرت بالحيله دى انها تنفد وتعدى جوازات مطار الخرطوم من غير ما حد يدرى انها هى. لبنى السعيد اضطرت للهروب لإنها كانت عايزه تحضر المؤتمر التنسيقى الاول للإعلاميات العربيات فى صنعاء لكن ممنوعه من السفر و بتقول انها بهروبها بالشكل ده مارست حقها الدستورى و طالبت السلطات السودانيه بوقف انتهاك حقوق المواطنين فى السفر. و قالت انها ناويه تعود السودان بعد ما تعمل لفه فى بلاد المنطقه ، و قالت انها مش حا تطلب لجؤ سياسى فى أى بلد بره السودان و لما تعود حا تكمل نضالها ضد القوانين اللى بتنتهك حقوق الستات و بتحط من كرامتهم ، و وضحت ان المحاكمه اللى اتعرضت ليها اكمنها لبست بنطلون كانت محاكمه من طرف واحد و انها ما اتسمحلهاش بالدفاع عن نفسها بالطرق القانونيه المعتاده.

البيان الختامى للمؤتمر اللى حضرته لبنى الحسين فى صنعاء أدان تعرضها لانتهاك قانونى و اجتماعى ، و التعدى على حقها الشخصى و تعريض سلامتها الشخصيه و المهنيه و الشخصيه للخطر .^[11]

فى الصومال بيتجلدو الستات بالكرابيج لو لبسو سوتيانات تحت هدومهم زى كل ستات العالم ، بإعتبار إن السوتيان فى عقليات الجلادين ضد الاسلام و نوع من الغش و التضليل للرجاله.^[10]

شوف كمان

• عصر الظلام الحديث
• تعسف
• عصور الظلام

• حوار الست المقهوره على العربيه نت Archived 2009-07-17 at the Wayback Machine
• اربعين جلدة كرباج و تهديدات عشان لبست ملابس فاضحه ( بنطلون )
• جلد ست سودانيه مع فيديو
• مظاهرات للستات لتأييد الصحفيه السودانيه اللى بتواجه الجلد بسبب ( بنطلون )
• البوليس السودانى يفرق مظاهره بتأيد صحفية بتواجه الجلد بسبب ( بنطلون )
• ظاهرة ستر المرأة Archived 2009-08-09 at the Wayback Machine
• الشرق الوسطانى : دعما للبنى الحسين Archived 2012-01-19 at the Wayback Machine
• إيداع لبنى الحسين السجن لرفضها دفع "غرامة البنطال"
• لبنى: سأواصل المعركة لإلغاء قانون "الفعل الفاضح" "
• الشرق الوسطانى : 48.000 ست اعتقلو فى الخرطوم بسبب هدومهم فى سنه Archived 2010-12-02 at the Wayback Machine
• عشرين جلدة كرباج لسودانيتين بتهمة لبس بنطلون
• جلد الستات فى الصومال بسبب لبس السوتيان Archived 2011-01-22 at the Wayback Machine
• ستين جلدة لإعلامية أعدّت حلقة "المجاهر بالمعصية"
• صحفية البنطلون تهرب من السوان فى نقاب افغانى ^{[permanent dead link]}

• العربيه.نت ، عدد 174 ، 12 اغسطس 2009.
• العربيه.نت ، عدد 165 ، 3 اغسطس 2009.
• العربيه.نت ، عدد 166 ، 4 اغسطس 2009.
• العربيه.نت ، عدد 167 ، 5 اغسطس 2009.
• الشرق الوسطانى ، عدد 11216 ، 13 اغسطس 2009
• العربيه.نت ، عدد 200 ، 7 سبتمبر 2009.
• العربيه.نت ، عدد 201 ، 8 اغسطس 2009.
• الشرق الوسطانى ، عدد 11244 ، 10 سبتمبر 2009
• العربيه.نت ، عدد 245 ، 22 اكتوبر 2009.
• الشرق الوسطانى ، عدد 11302 ،7 نوفمبر 2009