



البينسيلين (R-C9H11N2O4S) هو مضاد حيوى بينتمى لمجموعة البيتا لاكتام و بيستخدم فى علاج الامراض اللى بسبب ال باكتريا ال موجبة الجرام.
الاكتشاف
العالم الإسكوتلاندى السير اليكساندر فليمنيج هو اللى اكتشف البينسيلين سنة 1928 بمستشفى القديسة مارى فى لندن. و العالم الاسترالى هوارد والتر فلورى (اللى واخد جايزة نوبل فى الطب) هو اللى قدر يطور البينسيلين علشان يبقى دوا و يستعمل فى العلاج.
التطوير
البينسيلين الاولانى كان مجاله محدود (مش بيقتل كل انواع الباكتريا) و ماكانش ينفع يتاخد بالبؤ علشان كان بيتكسر فى المعدة بسبب الحمض Hcl الموجود فيها. و علشان كدا العلما درسو و طوّرو مشتقات كتيرة من البينسيلين بهدف توسيع المجال بتاعه و كمان علشان يخلوه ينفع يتاحد عن طريق البؤ. و شوية شوية ابتدا العلما يعلنو عن اكتشاف انواع جديدة من البنسيلينات زى "الامبيسيلين" و "الاموكسيسيلين" و بعدين طلعت مجموعة جديدة من (البيتا-لاكتام) اسمها "سيفالوسبورين" و اللى مجالها اوسع بكتير و ما بتتكسرش فى المعدة يعنى ينفع تتاخد بالبؤ. و فى بعض البينسيلينات الجديدة اللى مجالها بيغطى كمان الباكتيريا السالبة الجرام.
البينسيلين (و بقية مجموعة البيتا-لاكتام) بيبوّظ التركيب بتاع جدار الخلية الباكتيرية و بيخليه يضعف و مايتحملش الضغط الاسموزى (osmotic pressure) بتاع الباكتريا اللى فى الاخر بيخليها تنفجر و تموت.
طريئة تصنيعه
البنسلين بيتصنع من الفطر ,عن طريق اننا بنحط الفطريات دى تحت ضغط يخليها تنتج ماده دفاعية اللى هيا البنسلين . و فى طريئة حديثة عن طريق التكنولوجيا الحيوية . وبدات صناعته بشكل جدى مع الحرب العالمية التانيه .
عيوب البنسلين
لا توجد عيوب واضحة الا فى حالة سوء استخدامه، وتكون نتائج سوء استخدامه كنتائج سوء استخدام كافة المضادات الحيوية. لذالازماستشارة الطبيب اولا قبل اى استخدام للمضادات الحيوة ومنها البنسلين.
حساسية البنسلين
اكبر مشكلة للبنسلين هوا انه ممكن يسبب حساسية عند بعض الناس , وبتأدى الحساسية دى ساعات للموت فى دقايق لو الشخص مرحش المستشفى , ودى بتكون وراثه وبيتعمل اختبار حساسية فى الايد قبل الحقن عشان نتاكد ان الشخص معندوش حساسية للبنسليين , الحساسية دى بتبدأ فى دقايق وتلاقى الشخص وشه جاب الوان , وبعدين يبدا ضيق التنفس ودى اكبر مشكلة لانه لازم يتلحق فى دقايق بدوا حساسية وبعدين تنفس صناعى فى المستشفى عشان الحرص على التنفس هو اهم شئ لحد ما الحالة تستقر .
مقاومة البكتريا
بسبب ان البكتريا بتطور طريقة شغلها هيا كمان عملت مقاومة للبنسلين , وبتبطل شغله وبتفك حلقة البيتا لاكتام بتاعته , عشان كده العلما عملوا نوعين من البنسليين محميين من المقاومة دي
- اموكسكلاف ( اوجمنيتن - كيورام )
دا عباره عن اموكسيسيللين مع حمض الكلافيولينك , و الحمض ده بيدخل على البكتريا عشان ينتحر ويشتت البكتريا وطرقها الدفاعية فيدخل الاموكسيسيللين يدمرها .
- سلبكتام (يوناسين )
دا امبسيلين مع سلبكتام وبرضه محمى من مقاومة البكتريا .