| ||||
---|---|---|---|---|
معلومات عامه | ||||
اختصاص طبى | طب نفسى ، وسايكولوجيا ، وسيكسولوجى | |||
الاداره | ||||
ادويه | ||||
تعديل ![]() |
الضعف الجنسي: ضعف الانتصاب erectile dysfunction او اختصارن ED
![](http://upload.wikimedia.org/wikipedia/commons/thumb/9/97/Viagra_in_Pack.jpg/225px-Viagra_in_Pack.jpg)
الضعف الجنسى
بيسموه ساعات العجز الجنسى و المرض ده بيحصل لما العضو الذكرى بتاع الراجل ما يقدرش دايمن او بشكل متكرر ينتصب او يحافظ على انتصابه ساعة المعاشره الزوجيه . ممكن يكون فيه انتصاب مش كافى طول فترة المعاشره او انه بيحصل انتصاب بس مش كامل .
اعراضه
- اول شئ لازم تعرفه انه حصول الانتصاب فى فتره النوم ( لما بتكون العوامل السيكولوجيه ( النفسيه ) مش نشيطه بشكل كامل ) بيدل انه غالبن اسباب ضعف الانتصاب ساعة المعاشره مش عضويه وانما نفسيه والدليل ان الانتصاب بيحصل ساعة النوم . لكن مش معنى كده ان العكس صحيح , لانه فيه نسبة من الرجاله السولام جنسيا مبيحتلموش و مبيحصلهومش انتصاب ليلى .
- اهم عرض ممكن ملاحظته انه ساعات بيحصل انتصاب مستمر بس مش قوى وده اسمه الانتصاب الكسول , او بيحصل انتصاب قوى بس مش بيكمل خصوصا قبل عملية المعاشره الحقيقيه فى فرج الست , وده بيدل انه فيه مشكلة - غالبن - فى ميكانيكيه تدفق الدم فى ذكر الراجل ( واللى ممكن تكون بسبب مرض فى القلب او الاوعية الدمويه ) .
- مشاكل الانتصاب واعراضه سنهة لدرجة ان جمعيه الضعف الجنسى البريطانيه قدرت حصولها لراجل من كل 10 رجاله فى مراحل معينه فى حياتهم .
اشهر اسبابه
الضعف ده بيحصل غالبن بسبب ان الدم مش بيتدفق فى العضو الذكرى بشكل قوي
- اكتر اسباب اصابه الرجاله بالضعف الجنسى هى امراض القلب والاوعيه الدمويه( من المهم انك تعرف ان الضعف الجنسى ممكن يكون عرض لمرض مستخبى من امراض القلب والاوعيه الدمويه خصوصن )
- كمان مرض السكر ( بيعمل التهاب فى الاعصاب ) او اسباب عصبيه واللى غالبن ممكن تحصل نتيجة عمليه جراحيه لشيلان البروستاتا الوارمه . وبرضه فيه اسباب تانيه زى نقص الهرمونات الجنسيه ( زى الهرمون الذكرى توستوستيرون ) او بسبب تاثيرات جانبيه لشويه ادويه .
- مش دايمن بتكون فيه اسباب عضويه ومرضيه
- لكن مش دايمن بتكون فيه اسباب عضويه ومرضيه , لكن بيكون ضعف الانتصاب لمجرد اسباب نفسيه واوهام عند الشخص ده . وخصوصن انو فى بعض المجتمعات بتربط بين فحوله الراجل او رجولته عمومن وانتصاب ذكره ف ده بيعمل ساعات ضغط على الراجل و مخاوف ممكن تخليه ميحصلوش انتصاب اصلن . والمشكله من كده انو ساعات بيتعمد الراجل يخبى مرضه( ثقافه السكوت ) ويتكسف منه لانه بيعتبر انه عار عليه انه يكون ضعيف او عاجز جنسيا وطبعن بتسود الثقافه الشعبيه والتخريف بدل العلاج ودراسه السبب العضوى او النفسى اللى ادى بيه لكده . والعلما لاحظوا انه 1 من كل 10 رجاله بيتكرر ضعفهم الجنسى فى سن معينه فى حياتهم ( جمعية الضعف الجنسى البريطانيه ) .
الاسباب بالتفصيل
- اسباب عصبيه : اصابات النخاع الشوكى و المخ و الشلل الرعاش و الزهايمر و السكته الدماغيه stroke و تصلب الانسجه المضاعف Multiple sclerosis .
- اسباب هرمونيه : ورم الغده النخاميه او نقص الهرمون الذكرى توستوستيرون .
- اسباب فى الاوعيه الدمويه : ضغط الدم العالى او نقص وصول الدم للعضو الذكرى او مرض فى الدوره الدمويه الطرفيه .
- مرض بيورنيز Peyronie's disease : ده مرض بيصيب انسجه العضو الذكرى .
- اسباب مش عضويه : الاكتئاب و الشيزوفرنيا و الادمان والذعر الشديد و الارهاق العام او مشكلة فى الشخصيه ( نزعه فرديه personality disorders ).
- الجراحه: جراحات الاشعاع او جراحات القاولون و البروستاتا و الحالب او الشرج واللى ممكن تعمل تدمير لاعصاب الانتصاب او الاورده الدمويه اللى بتعملو . وكمان جراحات سرطان البروتساتا و سرطان الحالب واللى بيكون نتيجتها شيلان انسجه من اللى حوالين العضو المتشال نفسه وغالبن بت أدى لضعف او عجز جنسى .
- الشيخوخه .
- اسلوب الحياه : life style زى الخمره (تكتير شرب الخمره) و و الطخن obesity و التدخين ( نسبة حصول الضعف الجنسى عند اللى بيدخن بنسبه 85 فى الميه اعلى من اللى مش بيدخن ) عشان كده بيعتبرو التدخين مفتاح كبير فى الضعف الجنسى وده لانو بيسبب ضيق فى الاورده و علشان كده بيأثر على تدفق الدم .
دراسة سنه 2002 قالت ان الضعف الجنسى مرتبط بركوب العجله
- اسباب تانيه : دراسة سنه 2002 قالت ان الضعف الجنسى مرتبط بركوب العجله ( البسكلته ) بس ده على حسب عدد ساعات ركوب العجله وحسب الضغط اللى ب ياخد العضو الذكرى . وكمان فيه دلالات على ان العضو الذكرى الاقصر مرتبط اكتر بالضعف الجنسى .
التشخيص
التشخيص الطبي مفيش اختبار بشكل رسمى معين
- مفيش اختبار بشكل رسمى معين بيتعمل لكن ممكن بعض تحاليل الدم تكون مفيده او تكشف عن مرض تانى زى السكر او نقص الهرمونات الجنسيه او زيادة البرولاكتين ( نتيجة سرطان الغده النخاميه ) . وفى العموم الضعف الجنسى دليل على صحه عضويه مش كويسه او عادات اكل ضعيفه او طخن وغالبن بيكون السبب الاكتر انتشارن هوا امراض القلب والاوعيه الدمويه .
- فيه طريقه بسيطه ممكن نعرف بيها اذا كان سبب الضعف الجنسى عضوى ولا نفسى بتحديد اذا كان الانتصاب بيحصل علطول ولا لأ . اذا كان بيحصل علطول فدا معناه ان الضعف دلوقتى سببه فى الغالب عضوى . اما لو كان ساعات ( او نادرا ) فدا ممكن يكون نفسى او عضوى .
الاختبارات الاكلينيكه اللى بتتعمل لتشخيص الضعف الجنسي
- اشعه صوتيه دوبلكس :Duplex ultrasound دى لتقييم تدفق الدم فى العضو الذكرى .
- اختبارات على اعصاب العضو الذكري : اختبار اسمه bulbocavernosus reflex وده بيشوف استجابه الاعصاب بتاعه العضو . الدكتور بيفعص راس العضو glans اللى بتخلى الشرج تنكمش لو كانت الاعصاب سليمه والدكتور هنا بيلاحظ وقت عملية الانكماش ده بانه يبص على فتحه الشرج او يكون حاطط صابعه فيها . ( الاختبار ده بيتعمل لما يكون فيه شك فى مرض فى الاعصاب بسبب السكر او مرض تانى ) .
- من الطبيعى انه الراجل يحصله من خمس لست انتصابات وهوا نايم
- الانتصاب الليلى : Nocturnal penile tumescence NPT من الطبيعى انه الراجل يحصله من خمس لست انتصابات وهوا نايم خصوصا فى مرحلة ( حركه العين السريعه rapid eye movement REM ) ودى مرحله من مراحل النوم وغياب الانتصاب ده ممكن يدل على مشكله فى الاعصاب او فى تدفق الدم .. بس لازم تعرف ان مش كل الرجاله لازم يحصل عندهم انتصاب ليلى لانه فيه رجاله كتير سولام جنسيا ومعندهمش انتصاب ليلى ,لكن الرجوع للطريقه دى بيكون لما اصلن يكون الشخص عنده ضعف جنسى مش العكس .
فيه رجاله كتير سولام جنسيا ومعندهمش انتصاب ليلي
- طرق تانيه : وفيه طرق تانيه زى الطرق المغنطيسيه اللى بيعملوها الدكاتره .
العلاجات
المقاله الرئيسيه : علاجات الضعف الجنسى
علاجات متنوعه
العلاج بيعتمد على السبب
- اذا كان فيه نقص فى التوستوستيرون فالعلاج بيكون ان المريض ياخد الهرمون ده وان كان السبب الشائع هوه ان الدم مش بيتدفق كويس للعضو الذكرى لجواه بسبب مرض معين او تحديدا مرض السكر .
- اغلب العلاجات بتشتغل اساسن على تطويل فترة الانتصاب ساعة المعاشره مش بتعالج المرض او السبب فى الضعف الجنسى نفسه . والعلاجات دى زى :
- البورستاديل : Alprostadil وده بيتحقن بجهاز معين قبل المعاشره . متوافر ككريم فى بعض الدول باسم Befar والاختبارت التمهيديه بتقول ان كفاءته بتوصل ل83 فى الميه . بيشتغل بعد 10 دقايق الى ربع ساعه ولحد 4 ساعات (محتاجه مصدر)
- المنفاخ ابو حلقه : اسطوانه شبه المنفاخ لكن فيها حلقه ضاغطه بتساعد الدم انه يتدفق فى العضو قبل المعاشره بيسموه منفاخ الذكر .
- الهرمونات : مش علطول بتستخدم بس ساعات الدكتور بيلجأ ليها لكن بالاعتماد على سبب المرض نفسه وعوامل تانيه .
- جراحه فى الذكر : لما بتفشل الطرق التانيه بيتعمل جراحه لتركيب دعامات صناعيه جوه الذكر . ومن عيوبها غير انها مكلفه انها مش عكسيه ( مش بترجع ) .
- الاستشاره النفسيه : خصوصا لو السبب نفسى او ان العامل النفسى واحد من اسباب المرض .
- الضعف الجنسى برضه بيتعالج بحبوب او حقن او (لبوس فى العضو الذكري) . بتشتغل على زيادة اكسيد النيتروجين NO اللى لما بيزيد بيزود تدفق الدم فى العضو . لما بتفشل الحبوب بيستخدمو الحقن اللى بتتحقن فى العضو نفسه لكن من عيوبها انها بتعمل انتصاب مستمر Priapism ولو فشلت العلاجات الصيدليه دى ممكن يستخدم منفاخ من بره مع وجود حلقه منفصله على الذكر ( لاحظ فيه فرق عن المنفاخ اللى الحلقة جواه واللى بيشتغل قبل المعاشره ) ووجود الحلقه دى على الذكر بيتقال - ساعات - انها بتطول الذكر وفيه ناس بتستخدمها للاستمناء .
علاجات قطعيه
العلاجات دى مفيش عليها جدالات كتير
- كابتات الانزيم PDE5 : علشان انه فيه مجموعه من الانزيمات اسمها فوسفودايستريزس phosphodiesterases ودى موجوده فى مناطق مختلفه من الجسم لكن اهم واحد فيها بالنسبه لموضوعنا هوا رقم 5 عشان كده اسمه فوسفودايستريز 5 PDE5 .
- الادويه اللى بتكبت الانزيم PDE5 Inhibitors فوسفودايستريز 5 زى سيلدنافيل sildenafil ( فياجرا Viagra ) و فاردينافيل vardenafil ( ليفترا Levitra ) و تادلافيل tadalafil ( سيالس Cialis ) وكلها حبوب بتتاخد بالبؤ واللى بعد ما تتاخد بتوقف الانزيم PDE5 اللى بيعمل تحلل لcGMP. و CGMP ده بيخلى العضلات الناعمه smooth muscles بتاعه شرايين العضو الذكرى ترتخى فتتملى corpus cavernosum بالدم . فابلتالى لما بنوقف PDE5 عن الشغل بنساعد CGMP انه يشتغل على زيادة تدفق الدم فى الذكر .
علاجات خلافيه
العلاجات دى فيها شوية جدل
- نالتركسون : Naltrexone من علاجات الادمان وممكن يعالج لو مفيش رغبه للجنس libido .
- بريميلانوتايد: Bremelanotide بخاخ بالمناخير ودا مش بيشتغل على الاوعيه الدموية لكن بيزود الرغبه الجنسيه عند الرجاله والستات , وهوا عموما بيشتغل على مستقبلات الميلانوكورتين melanocortin receptors فى المخ ولسه تحت التجريب .
- ميلانوتان2 : Melanotan II نفس الكلام على اللى قبله.
- الجنسنج : Ginseng عشب كورى مشهور من زمان بانه بيعطى طاقه . فيه دراسه سنه 2002 بتقول انهم لاحظوا تحسن فى علاج الضعف الجنسى عند الناس اللى بياخدوه بالمقارنه مع الناس اللى مبتاخدوش .الدراسه اتنشرت فى ((Journal of Urology 168 (5) .
- ال ارجنين اسبارتيت : L-arginine aspartate بيتعمل منه مخلوط مع بيكنوجينول Pycnogenol اسمه بريلوكس Prelox . الدراسه اللى قام بيها دكتور ستيفن لام من كليه الطب جامعه نيو يورك بيقول فيها ان 81.1% من الرجاله اللى درسهم بقا عندهم تحسن اكتر فى قابليتهم للممارسه الجنسيه ,اما الشركه اللى مصنعه البريلوكس فبتقول انه لما بيتاخد يوميا بيرجع التلقائيه تانى لحياة الحب عكس المنتجات التانيه اللى مرتبطه اخداناها قبل الممارسه بوقت معين .
علاجات تانيه
- الزنك : Zinc بيمنع تحول الهرمون الذكرى توستوستيرون الى استراديول , و علشان كده فالزنك بيساعد فى زيادة التوستيستيرون و علشان كده زياده الحيوانات المنويه وكمان المعدن ده نقصه علامه من علامات الضعف الجنسى واللى العلما لاحظوا انه بينقص فى حالات التهاب البروستاتا البكيترى او الغير بكتيرى عشان كده هوه مفضل لمرضى البروستاتا والضعف الجنسى .
تاريخ
- اول ناس فكروا فى علاج الضعف الجنسى هما الدكاتره والصيادله المسلمين وهما اول ناس بداوا يوصفوا علاجات للموضوع ده سواء عن طريق ماكولات معينه او ادويه وحتى دهانات وبداو يوصفوا ادوية مجربه من القرن التاسع الى القرن الستاشر . ومن اشهر العلما دول محمد بن زكريا الرازى و ثابت بن قره و ابن الجزار و ابن سينا و ابن البيطار و ابن النفيس و ابن رشد .من كتاب (The Comprehensive Book on Medicine).
- من سنه1920 الى 1930 نجح الدكتور جون برينكلى John R. Brinkley انه يعمل نقله فى علاج الضعف الجنسى فى امريكا عن طريق برنامج راديو كان بيدى فيه نصايح وعلاجات . كان بيعتمد على زرع غده المعيز مع حقن الميركروكروم وزعم انه بيرجع الرجوله بعمليه جراحيه غاليه بالتضامن مع الجراح سيرجى فورونوف Serge Voronoff لكن ترخيص برينكلي الطبى اتسحب و علشان كده وقف البرنامج بتاعه لكنه سافر من حدود تكساس للمكسيك وهناك فتح عياده وبدا نصايحه فى راديو بوردر بلاستر border blaster .
- سنه 1970 بدا العلما فى زراعات جوه العضو الذكرى كانت بتتنفخ inflatable penile implants .
- الطب الحديث عمل نقله سنه 1983 عن طريق بروفيسير الفسيولوجى البريطانى جيليس بريندلى Giles Brindley واللى فاجئ الحاضرين من جمعية طب المسالك البوليه وقلع بنطولنه وحقن عضوه الذكرى بماده الفنتولامين phentolamine واللى عمله انتصاب نتيجة توسعه الاورده فى الذكر ومن هنا كانت البدايه لادويه تتاخد بالبؤ لتوسيع الاورده وزياده تدفق الدم .
المصادر
- ويكيبديا الانجليزيه بمصادرها .
- الضعف الجنسي Archived 2011-01-08 at the Wayback Machine